The best ang Pinoy teacher

Tulong…daw oh?!!! Teka ano ba talaga ang salitang pagtulong? Ah, basta ako ‘di ko maipaliliwanag ‘yan lalo na sa pananaw ng mga Pinoy. Dahil marami tayong interpretasyon d’yan. Alam nyo naman na sikat tayo lalo na pagtulong sa kapwa, mainit na pagtanggap sa bisita (hospitality) at magiliw sa lahat ng nakakasalamuha. Ilan lamang ito sa mga katangian ng mga Filipino na talagang “unique" sa atin. 'Di ba kilala tayo sa pagiging friendly at masayahin? Lalo na kapag ang mga gurong Filipino ang pag-uusapan sa lokal man o nasa ibang bansa. Sikat tayo dyan! (o walang kokontra). Sa madaling salita, isa ako sa mga guro sa bansang China na halos limang taon nang nandito sa lugar na ito. Dito kung saan nahubog ang tunay na kahulugan ng pagiging “Bagong Bayani" na kung tawagin ng ating mga kapwa OFW. Bagaman malayo ng ilang oras sa ating bansa, humahanap pa rin kami ng paraan kung paano kami makababalita sa mga nangyayari sa Pinas. Lubos akong nagpapasalamat sa GMA network at sa Pinoy Abroad dahil dito lang ako nakakukuha ng maayos na balita at impormasyon. Salamat po talaga. Labis akong nalungkot sa aking napanood tungkol sa mga ‘Korean na nais matuto ng Ingles.’ Nakagugulat lamang kasi kung bakit sa Pinas pa sila mag-aaral. Dahil ba sa mura mag-aral dito (sa Pinas)? Nakapagtataka lang dahil sa mga job website ng Korea, hindi sila tumatangap ng mga gurong galing sa Asya – partikular sa Pilipinas. Siguro may iba dyan na pinalad na makapasok sa bansa nila, swerte kayo! Tama rin naman ang desisyon ng ating gobyerno na tangapin sila upang maging matatag at mapalago ang relasyong ng gobyernong Pilipinas at Korea. Bukod dito tatangap tayo ng donasyon bilang kapalit sa kanilang pag-aaral. At sana lubos na makinabang ang mga Filipinong mag aaaral. Ang Department of Education ay talagang gumagawa ng paraan upang maipakita na ang kalidad ng pag-aaral ng Ingles sa ating bansa ay talagang mataas. Mga gurong may sapat na talento at kalidad lalo na sa pagtuturo ng Ingles na dapat talaga nating ipagmalaki. Oo, sang-ayon kami sa ganitong programa. Pero nakalulungkot isipin na ang mga Korean na nais mag-aral ng Ingles ay isang paraan lamang nila upang mawalan ng trabaho ang mga gurong Filipino na nais magturo sa kanilang bansa. Alam naman siguro ng ating gobyerno na mahirap humanap ng trabaho sa bansang Korea lalo na sa pagtuturo ng Ingles. Alam n’yo ba na ang gobyerno ng Korea, lalo na ang departamento ng edukasyon nila ay tumatanggap lamang o ang lagi nilang hinahanap sa kanilang job website ay pawang mga “native speakers?" Tayong mga Pinoy na guro ay kasama sa tinatawag “non-native speakers." Kung saan ang salitang Ingles ay ang ating pangalawang wika – sa paaralan, komersyal at kahit sa media natin. Hirap tayong makapasok sa bansa nila lalo na kung hindi ka puti o blue eyes. Kahit sabihin pa na may kakayahan kang magturo ng ganitong subject. Hindi kaya mulat ang ating gobyerno sa mga bagay na ito? Na ang t’yansa natin na matangap sa bansa nila ay napakaliit lamang na kung minsan ay “second choice" na lang tayo…o minsan ay talagang hindi dahil “Pinoy ka lang…" Pinoy ka lang? Masakit isipin ngunit ito ang reyalidad na dapat alam ng lahat ng mga Filipinong guro. Talagang tayong mga guro sa Pinas ay ‘di matatawaran ang galing at kakayahan sa pagtuturo ‘di lamang sa asignaturang Ingles kundi pati na rin sa iba pang subjects. Tayong mga Filipinong guro ay likas na “creative" pagdating sa pagtuturo, may tiyaga sa ating mga estudyante na wala sa ibang nasyon. Nakapanghihinayang lamang na ang mga magagaling na gurong ay nagagamit sa maling programa. Dapat kapwa Pinoy na lamang ang turuan nila upang lalo tayong umangat kaysa sa ibang nasyunal. Ito na lamang ang tanging yaman na hindi makukuha ninoman. Hahayaan pa ba nating mawala ito? At para sa gobyerno natin, sana buksan ang kanilang isipan na ang pagturo o pagtulong sa mga Koreano ay hindi masama. Hilingin nilang magkaroon tayo ng pagkakataong makapagturo malaya sa kanilang bansa. Ang pagtutulungan ng bawat bansa ay dapat “give and take," hindi yung isa lamang ang makikinabang. Mga gurong Pinoy, huwag nating hayaang makuha pa nila ang bagay na tayo lamang ang may alam. Huwag n’yong hayaan na sa pagdating ng panahon na ang wikang Ingles na tayo lamang ang nakapagtuturo nang maayos ay maagaw pa ng ibang nasyon. Annie B.R. Changzhou City, China